Wasu Abubuwan Mamaki da Suka Fi Daukar Hankali a yayin da ake tsaka da Gasar cin Kofin Duniya na 2026
Yayin da gasar Kofin Duniya (FIFA World Cup 2026) ke ci gaba da gudana a Amurka, Kanada da Mexico, an fara ganin wasu abubuwa masu ban mamaki da suka sauya hasashen masana da masu bibiyar ƙwallon ƙafa a duniya.
Babban abin mamakin dai zuwa yanzu shi ne yadda ƙasashe masu ƙarancin tasiri da suna a duniya suka fara nuna cewa ba za a raina su ba. Morocco ta yi kunnen doki da Brazil da ci 1-1 a wasan rukuni, inda ta taka rawar gani har ta sa wasu masana suna ganin ƙungiyar na da damar kai wa matakai masu nisa kamar yadda ta yi a gasar shekarar 2022.
Wani abin mamaki kuma shi ne yadda Amurka ta fara gasar da gagarumar nasara bayan ta doke Kasar Paraguay da ci 4-1. Wannan shi ne ɗaya daga cikin manyan sakamakon da aka samu a farkon gasar, kuma ya ƙara wa masu masaukin baki kwarin gwiwa.
A gefe guda kuwa, Australia ta ba mutane mamaki bayan ta doke Turkiyya da ci 2-nema a wasansu na farko. Mutane da dama ne suka yi hasashen Turkiyya za ta yi nasara saboda dawowarta gasar bayan shekaru masu yawa, amma Australia ta nuna kwarewa da tsari ayayin karawar.
Haka kuma, sabon tsarin gasar mai ƙungiyoyi 48 ya sa an samu ƙarin dama ga ƙasashe masu tasowa. Wannan ya ƙara yawan wasanni da kuma yiwuwar samun sakamakon da ba a yi tsammani ba, abin da ya sa gasar ta zama mai kayatarwa fiye da yadda aka saba.
Masana na ganin cewar idan har abubuwa suka ci gaba da tafiya haka, za a iya ganin wasu manyan ƙasashe suna fuskantar ƙalubale daga ƙananan ƙasashe kafin a kai zagayen fitar da gwanin. Wannan na nuna cewa ƙwallon ƙafa ta duniya na ƙara samun daidaito, inda tarihi da suna kaɗai ba sa tabbatar da nasara.
A halin yanzu, darasin da gasar ke koyarwa shi ne cewa babu wata ƙungiya da za a raina. Ƙasashen da aka ɗauka masu rauni na iya zama tushen manyan abubuwan mamaki a Kofin Duniyar na bana.
